موقع الصالح : الطفل “يزن” موهبة تخطف القلوب في دراما رمضان وانطلاقة مميزة من “ولاد رزق”

أثار الطفل أدم في مسلسل وتقابل حبيب تعاطف الجمهور لفقدانه لوالدته خلال الحلقات الماضية وكذلك الطفل عبد الله الذى يعيش مع والدته وشقيقته بعد وفاة والده بمسلسل إخواتى، هو الطفل يزن العيسوى الذى استطاع أن يدخل قلوب الجمهور منذ طلته الأولى على الشاشة وتحدثت والدته آية عبدالحفيظ، لـ” اليوم السابع”، عن بداية ظهور يزن على الشاشة حيث قالت: “يزن عمره خمس سنين ونص، واكتشفنا موهبته لما المخرج طارق العريان طلب إنه يجسد دور ابن أحمد عز في مسلسل ولاد رزق 3، وطلع في مشهد وهو بيفتح الباب لـ كريم عبد العزيز لما بيقولوا يارضا فيه واحد شبهك عايزك برا”.

تابعت:” في المشهد ده اكتشفت أن يزن قدام الكاميرا حاجة تانية خالص، وبعدها بدأ يقولى ياماما أنا بحب التمثيل ويسألنى هو مفيش فيلم أو مسلسل قريب، وتم ترشيحه للمسلسلات رمضان 2025 عن طريق إحدى الشركات وعمل أوديشن على مشهد من مسلسل وتقابل حبيب وبعد كده المخرج محمد الخبيرى طلب يقابل يزن وعملنا أوديشن تانى وبعده المخرج و ياسمين عبد العزيز اختاروا يزن وبعد كده رشح لمسلسل إخواتى من خلال إحدى الشركات المعنية بذلك في دور عبد الله ابن روبى ورشح لدور سمير ابن مصطفى شعبان في مسلسل حكيم باشا، لكن هيبدأ يظهر فيه في الحلقة 26″.

وعن تحضير الطفل يزن لأدواره في مسلسلات رمضان 2025، قالت والدته :” أنا بقرأ السيناريو وأفهمه وبذاكر ليزن وهو عشا حابب التمثيل بيفهم بسرعة وبيكون قدام الكاميرا حاجة تانية خالص، وعمرو محمود ياسين مؤلف مسلسل وتقابل حبيب ومخرج مسلسل إخواتى محمد شاكر خضير أشادوا بيزن بطريقة غير طبيعية لدرجة إن اتفاجئت بردود فعلهم”.

وعن الصعوبات التي واجهت الطفل يزن خلال تصوير أدواره في الثلاث مسلسلات الرمضانية قالت والدته:” إنه كان بيفضل في التصوير لساعات كتير، ومش بينام كويس، وعنده إمتحانات ودوره طويل في مسلسل وتقابل حبيب لكن الصراحة الفريق هناك كله بيحبوا وبيحاولوا يريحوا وبيتعاونوا معاه”.

وتحدثت والدة الطفل يزن العيسوى عن أجواء الكواليس التصوير، فقالت:” كواليس التصوير مع ياسمين عبد العزيز كانت كلها ضحك وهزار وأول ماتشوفوه تحضنه وتتصور معاه وخالد سليم لطيف جداً وجنتل مان وبيحب يزن أوى ومرة قالوا أنت في يوم من الأيام هتبقى نجم وأنا هاجى أتصور معاك، أنت هتبقى ممثل كبير أوى، وروبى من ألطف الشخصيات اللى اتعاملنا معاها وبتحب يزن جداً وكانت بتقوله أهم حاجة المدرسة ومصطفى شعبان لطيف جداً معاه، وكريم فهمى قريب جداً من يزن، وبيقضوها ضحك ولعب وهزار، وأحضان في اللوكيشن “.

وعن أصعب مشهد للطفل يزن، قالت والدته :”كان فيه مشهد بمسلسل وتقابل حبيب كان يزن بيصحى من النوم وبيجرى من البيبى سيتر، ووالده بيصحى على صوته والمفروض إنه بيكون عايز والدته وبيعيط فماكنش عارف يعيط إزاى حاولت أتكلم معاه أكتر من مرة لحد ما استجمع مشاعره وفعلا ظهر في المشهد وهو حزين جداً والمشهد التانى بعد ما فارس بيعرف أن زوجته نهى ماتت بيطلب منه أدم إنه يكلمها وأنا الحقيقة اتفاجئت بأداء يزن في المشهد ده لأن صوته كان كله حزن”.

وعن توفيق يزن بين دراسته وتصويره لأدواره بمسلسلات رمضان، قالت والدته:” يزن ماكنش منتظم كل الأيام بس محمد عبد المجيد المخرج المنفد لمسلسل وتقابل حبيب ومحمد سعيد المخرج المنفذ لمسلسل إخواتي، الأتنين كانوا قمة في الإحترام بصراحة كانوا بيراعوا موضوع الدراسة ويظبطوا المواعيد مع بعض وكانوا بيحبوا يزن وكانوا دايماً بيقولولى إحنا عمرنا ماهنقف ضد مصلحة يزن، وأنا ووالده بنذاكر معاه والحقيقة هو متفوق في المدرسة وفى الترم الأول طلع الأول على كى جى ون”.

والمثل الأعلى للطفل يزن العيسوى في مجال التمثيل، قالت والدته:” بيحب أستاذة ياسمين عبد العزيز وكريم فهمى وأنوشكا وأحمد عز ده كان روحه ونفسه يمثل مع هشام ماجد وشيكو وأكرم حسنى “.

يزن مع النجمة روبى

يزن مع النجمة كندة علوش

يزن مع النجمة ياسمين عبد العزيز

الطفل يزن مع النجم محمد ممدوح

كواليس تصوير مسلسل وتقابل حبيب

كواليس مسلسل حكيم باشا

كواليس مسلسل وتقابل حبيب

يزن ببوستر مسلسل حكيم باشا

يزن مع النجم كريم فهمى

يزن مع النجمة أنوشكا

شاهد المزيد من أخبار مسلسلات رمضان عبر بوابة دراما رمضان 2025